قصة محزنة عن واقع أليم من أبناء المحروسة

بواسطة حواديت مصرية · نُشر: نوفمبر 12, 2017

آخر تحديث: نوفمبر 12, 2017 · ليست هناك تعليقات

الصوره التي نشرها صاحب القصه

بالامس كنت بتصفح موقع التواصل الاجتماعي تويتر توقفتنى تويته نشرها حساب ما فيها قصه مؤلمه لمواطن مصري من المنصوره نزل القاهره هو ولده يعملوا ورق المعاش رجع بتصريح دفن ولده القصة اثرت فيا بشكل شخصي وتواصلت مع صاحب القصة وطلبت منه اني انشر قصته علي مدونتي المتواطه دى علي امل توصل لعدد كبير من الناس و نجيب حق عم ابراهيم واليكم هذه القصه لا انقص فيها حرف ولا ازود فيها حرف

"ابويا تعب ومات في تأمين المعاشات بسبب موظف ..

-يوم 31/10/2017 سافرت انا وابويا القاهرة عشان نضم مدة التأمين من مكتب تأمين مصر الجديدة للمنصورة ودخلنا للموظف المسئول عن ضم المدة ، رفض يعملنا الورق وقال تعاله بعد 20 يوم ابويا قاله انا تعبان بالقلب ومش هقدر اجيلك تاني قاله مليش دعوة اتفضل امشي وتعاله بعد 20 يوم ابويا قعد يتحايل عليه حوالي ساعة وهو مش بيرد علينا وفضلنا طالعين نازلين وراه وهو ولا معبرنا ابويا حسيته تعب قولتله اقعد وهحاول تاني معاه اتكلمت معاه باحترام اتكلم معايه اكن واحد كافر بيكلمه قولت اشوف حد يقدر يكلمه برده مرداش فضلت واقف لحد ما قالي تعاله وعملي الورقه في دقيقه بعد ما كان بيقولي بعد 20 يوم وكل شوية يبصلي ويقولي انا مبعملش كده مع حد عاوز مني (رشوة) اخدت الورقه وطلعت للمدير كتبلي رقم الملف.

نزلت تحت لموظف الأرشيف قالي استني ادور دخل 3 دقائق وطلع قالي مش لاقي الملف طبعا يعني كده انا مليش مدة والملف ضايع منهم فضلت طالع نازل علي الموظفين ولا حد معبرني لحد ما ابويا قالي رقم الملف ده حاسس انه غلط طلعت للمدير فعلا طلع كاتب رقم الملف غلط نزلت لموظف الأرشيف قالي مش هدور علي حاجه عاوز انت ادخل دور طبعا شقة حوالي 150 متر فيها حوالي 3 مليون ملف ومعرفش اي حاجه فيها المفروض ادخل ادور ودخلت بعدها علي طول دخل واحد قالي ابوك تعبان خرجت لقيت ابويا بيموت حاولت اعمل اي حاجه معرفتش اخدته وركبت تاكسي وكل ده انا وابويا بس في القاهرة محدش معاية يقف جنبي .

روحت مستشفي منشية البكري مفيش اي حد بيخرج ياخد الحالات من بره بقيت اشحت الناس من الشارع عشان تشيل معايه ابويا ادخله جوه ، ولما دخلت بقول لدكتورة ابويا بيموت الحقيني ابوس ايدك تقولي استني وسبتني ومشت ورجعت معاها دكتور بيقولي هو كان تعبان بأيه قولتله القلب (طبعا علي ما الدكتور جالي كان ابويا مات قدام عيني وعلي ايدي وعارف انه مات بس مكدب نفسي ) الدكتور قالي دكتور العناية مش موجود قالي طيب اطلع بره فضل جوه حوالي نص ساعه طلع قالي البقاء لله ... قولتله طيب هاخده وامشي قالي ماشي وطبعا انا مليش حد في القاهرة كلمت قرايبي وبعدين طلع ممرض قالي لا لازم تعمل تصريح دفن ومرضاش يخليني اخد ابويا وتصريح من المستشفي وامشي رغم ان الدكاتره كانوا موافقين حاولت افهمه ان معرفش اي حاجه هنا وهو ولا هو هنا كل لما اسأل اعمل تصريح الدفن منين ولا حد بيرد عليا ولا حد معبرني لحد ما راجل كبير اخدني وروحنا الصحة نعمل التصريح وكل لما اقول لحد خد بالك بس من ابويا يطلعلي مليون حجه لحد ما واحد اخد مني فلوس عشان ياخد باله منه .

بتاع الصحة رفض يعمل التصريح وقالي روح المنصورة هات ورقة تثبت انه كان تعبان قولتله هو ميت في المستشفي وقضاء ربنا قالي المستشفي كاتبه انه جاي ميت وكان عاوز يعملي محضر وابويا يتشرح .. رجعت المستشفي تاني وعرفت الدكتور ان ابويا ميت هنا وفهمته وغير الورقه روحت لمكتب صحة تاني مرداش يعملي الورق بحجة انه مش مختوم اخد مني فلوس وطلعلي تصريح الدفن .

رجعت المستشفي مديرة المستشفي كتر خيرها نزلت تقول شيلوا الجثة دي من هنا دخلوها الثلاجة وطلعت تاني وانا رفضت دا وقرايبي لما وصلوا بتاع الثلاجة اخد مني فلوس عشان يخرجهولي.

كل ده كنت متوقعه اللي مكنتش متوقعه ان ابويا يبقي ميت ويتسرق منه الفلوس وهو ميت ولو كان معاه موبايل غالي كان اتسرق بس قولت الحمد لله انه اخد الفلوس بس وان معايه فلوس اقدر اتصرف .

رجعت الاسبوع اللي بعده عشان اعمل الملف نفس الموظف قالي مليش دعوة اطلع للمدير طلعت للمدير قالي انزل الأرشيف نزلت وبرده قالي ادخل دور انت دخلت وملقتش برده الملف وصورت المنظر القذر ده طلعت تاني للمدير قالي ارجع الشركة اللي كان والدك شغال فيها هات الملف وتعاله روحت وجبت الملف ورجعت يوم الاربع للمدير بصراحة هو اللي فهمني اعمل ايه وفضلت موجود من 9 الصبح لحد 3 العصر عشان موظف المراجعة غايب وموظف تاني مكانه قاعد وكل ده عشان يمضي علي الورق وطبعا بيشتموا الناس وبيعملوهم اقذر معامله وبرده صورتهم .. ولما خلص انزل للموظف اللي هو السبب في كل حاجه مرداش يخلصلي الورق بحجة انه مش فاضي وهو قاعد مش بيعمل اي حاجه وبيخدم صحابه بس فضلت اتحايل عليه ساعه لحد موافق واخد مني فلوس (رشوة) برده عشان يخلصه في نفس اليوم .

انا مبقولش غير حسبي الله ونعم الوكيل في الناس دي مفيش اي ضمير ولا احساس بالناس رايح اعمل ورقة معاش رجعت بتصريح دفن وكل حاجه بتخلص بالرشوة حتي يوم الاستقبال للمستشفي مفيش دكاتره ولا بيحسوا بأي حد عادي واحد مات مش مشكلة ، انا كاتب الكلام ده يمكن يوصل للناس اللي قاعدين علي كراسي فاكرين ان كل حاجه زي الفل ربنا موجود وبيخلص برده ... وفعلا انا كرهت البلد بكل حاجه فيها بلد كل حاجه فيها ظلم وقرف ومحدش حاسس بأي حد"

بوست القصه علي الفيسبوك من هنا

بعد هذه القصة المؤلمه حزن من حزن وبكي من بكي انا بطالب من اي شخص عندو ضمير لسه في البلد دي يجيب حق عم ابراهيم وياريت كل الناس تنشر القصه علي صفحتها علي تويتر او الفيسبوك وادعوا لعم ابراهيم برحمه واقرأوا الفاتحة لعم ابراهيم

ملحوظه....